未入正題之前，先講一段古。話說戰國時代商人呂不韋偶遇秦昭王個孫子楚，當時正喺趙國做人質，呂不韋洞察先機，刻意栽培，送錢送美女，後來子楚個仔成為秦始皇，呂不韋「造王」成功，成為亞父、相國，好不威風，而呢個亦係成語「奇貨可居」嘅出處。
冇錯嘞，講緊嘅之唔係因意圖妨礙司法公正被判監十八個月、人稱「夢熊大師」嘅劉夢熊囉。呢位老哥從商多年，有「期貨教父」之稱，唔知係咪見呂不韋「炒人」炒到風生水起，仲發過「炒期貨」多多聲，於是有樣學樣，年前介入特首選舉，以「造王者」自居，而且胃口一啲都唔細，除咗謀住政協常委嘅高位，仲想做埋行政會議成員，實行「一國兩制」兩邊通吃。點不知最後竹籃打水一場空，自此以後佢老哥就反轉豬肚，一有機會就單單打打抽水狂插政府，仲激過班反對派政客。
求官不遂已經夠樣衰（口架）喇，夢熊大師早排捲入串謀詐騙案後，又被指向特首發電郵，要求對方同廉政專員「打招呼」，停止調查，結果妨礙司法公正罪成，仲要洗淨個八月十五，即時收監添。佢老哥之前憑一曲《人在旅途灑淚時》寄意，估唔到真係一語成讖，「炒人」炒燶咗，「造王者」淪為階下囚，真係唔慌唔一殼眼淚。
難為劉夢熊成日自詡熟讀史書，通古今之變。其實係人都知，上下五千年，商人掂親政治從來都冇好下場，呂不韋最後被秦始皇流放，自殺收場；明初巨富沈萬三叻唔切，主動出資幫明太祖修建南京城牆，又打算犒賞軍隊，以為有官做喇，點知逆批龍麟弄巧成拙，落得發配邊疆，為天下笑；仲有清末嘅胡雪巖，官場、商場一樣咁吃得開，開「紅頂商人」先聲，夠晒威水喇啩，最後咪又係家散人亡。
講起唔知好笑定好嬲，夢熊大師出庭前仲引用清末先烈譚嗣同嘅「我自橫刀向天笑，去留肝膽兩崑崙」，懶係豪氣干雲，一身正氣，一往無前咁，可惜吖，罪名最終都係吟詩都吟唔甩。想當年，作為「戊戌六君子」之一嘅譚嗣同，為咗國家變法富強而犧牲自己，絕對係敢做敢擔當、視死如歸嘅大英雄，同做官夢碎、未坐監已經氣急敗壞嘅大灰熊，根本不可同日而語。
不過點講都好，夢熊大師有句嘢講得冇錯。「善有善報，惡有惡報。若然不報，時候未到。時候一到，一切都無。」有人鋃鐺入獄，身敗名裂，一切都無，咪就係現眼報囉。話時話，夢熊大師咁鍾意吟詩，不妨送佢一句古詩︰「十年富貴隨輕覆，奇貨元來禍更奇」，反正獄中閒來無事，好好花時間參透吓喇。