政情：黃靜文做貿發局女財爺

政制及內地事務局前副局長黃靜文（Adeline、圖右）去年約滿卸任中華廠商聯合會行政總裁後，最近正式返新工過檔貿易發展局任助理總裁，適逢尋日係貿發局春茗，Adeline話依家返咗新工一星期，主要負責貿發局內務工作，包括人事編制、及為貿發局制訂預算等。當問及係咪代表做咗貿發局嘅女財爺？Adeline對此只笑不語，身旁嘅貿發局總裁方舜文則話Adeline做過廠商會，管錢梗係冇問題，至於係咪佢本人介紹Adeline入貿發局，方舜文承認二人相識好耐，但以上職位係經過公開招聘程序。（余素月攝）