香港嘅競爭力每況愈下，點樣急起直追迫在眉睫。直接隸屬於財政司司長嘅經濟分析及方便營商處，打算將政府經濟顧問由首長級第四級（D4）升至D5，並增設屬於D3級嘅副政府經濟顧問，以便政府經濟顧問陳李藹倫可以親自領導如競爭力研究、分析等極需加強嘅項目。同時打算保留首席經濟主任三年，以便加強政府喺人口、扶貧及福利政策範疇嘅分析及研究。
點知立法會人事編制小組委員會尋日討論有關事項時，一眾議員提問不着邊際。梁耀忠及郭偉強無厘頭咁將件事扯到標準工時。梁耀忠問政府有冇就長工時而導致勞工界身體勞累、醫療負荷等無形經濟問題，作出詳細研究及評估？
陳李藹倫無好氣咁回應，呢啲社會因素好難量化成為經濟數據。工聯會郭偉強就直言，委員會提供嘅數據係為商界護航咁話。
社民連梁國雄及民主黨涂謹申（阿涂）關心嘅竟然係首席經濟主任會唔會調去搞「一帶一路」，最後要陳李藹倫承諾唔會咁樣做先至肯罷休。