政情：版權法勢危 莫乃光知驚
商務及經濟發展局局長蘇錦樑（Greg蘇）上周宣布提早「跪低」，指如立法會本周大會仍未通過《二○一四年版權（修訂）條例草案》，政府將會「就此作罷」，外界估計於激進泛民繼續拉布下，版權法束之高閣嘅機會甚高，就喺呢個命懸一線之際，資訊科技界立法會議員莫乃光（Charles）忽然聯同會計界議員梁繼昌提出新建議，即引入「非商業處理」嘅方式，莫非Charles終於聞到燶味知驚，擔心版權法一旦觸礁，自己於九月立法會選舉嘅選情會大受打擊，因此要提早力挽狂瀾？
立法會大會明日復會審議版權法前夕，Charles同梁繼昌尋日舉行記者會，就版權法提出新建議，包括引入「非商業處理」方式，意即表演或錄製品如果唔係用作商業用途，就唔屬於侵犯版權。
急急提新方案
梁繼昌補充指，如果政府接受佢哋嘅新方案，版權法有機會於本立法年度通過。Greg蘇接受傳媒查詢時話仍未收到有關新方案，重申拉布係會減低通過草案嘅機會，唔知Charles會否覺得係對牛彈琴呢？