政情：行政亂 立會爛 政府廢 CY最好着盔甲
立法會新界東補選告一段落，喺旺角暴亂中被控暴動罪嘅本土民主前線梁天琦雖然未能當選，但仍然獲得六萬多票，得票率達一成半，可以預見喺九月舉行嘅立法會選舉中，本土勢力不可小覷。隨着社民連、人民力量等傳統激進泛民被新一代嫌棄唔夠激，假使本土派成功派員循地區直選進入議會，相信議會將會「沒有最激，只有更激」，旺角街頭掟磚嘅情景好快喺議會上演。新一屆立法會議員任期將喺十月展開，與現屆政府任期重疊大約九個月，特首梁振英（CY）將來出席答問大會時，分分鐘要變身鐵甲人先至可以保平安喇！
無力剪布 幾乎癱瘓
現時香港嘅狀況十足係「行政亂、立會爛、政府廢」。政府行政混亂係眾所周知，單睇上星期出爐嘅財政預算案，已經明顯同早前發表嘅施政報告格格不入。財政司司長曾俊華更處處唱反調，包括刻意少提「一帶一路」，形容旺角暴亂為「嚴重的違法事件」等。政府內部各懷鬼胎，實在令人擔心日後施政會進一步混亂。
至於立法會，對泛民議員肆意拉布束手無策，導致多項工程超支及多項法案延誤不特止，《二○一四年版權（修訂）條例草案》恢復二讀兩個多月以來，更發生咗五次流會，幾乎陷入癱瘓狀態。此外，政府早前宣布「跪低」，如果版權條例草案喺今個星期未能通過，便就此作罷；再加上廣深港高鐵香港段追加撥款嘅「死線」已過，而財委會上周仍未能通過，換言之總值一百九十六億元嘅工程隨時爛尾。
監察政府 靠晒傳媒
面對「亂」、「爛」、「廢」，社會嘅怨氣愈來愈大。傳統泛民掟蕉、冧枱、潑水、講粗口甚至掟杯已經被認為唔夠激，有陰謀論更猜疑泛民議員其實特登掟唔中，於是造就打激進勇武旗號嘅本土組織支持度大增。社交網站Facebook早前一推出「嬲嬲」表情符號，CY嘅fb貼文即收到逾十萬個「嬲嬲」，第時若真有本土派入到議會，CY真係要着到鐵甲人咁先可以確保人身安全。講到尾，現時行政、司法及立法三權瀕臨崩潰，惟有寄望傳媒運用第四權好好監察政府喇！