慈善基金：生活照相館 留住家庭笑臉
智障人士平日居於宿舍，需與家人分離，而家屬年齡隨年增長，未必能定時探望，相聚時間或因此變少。有見及此，基督教懷智服務處美田綜合復康服務中心舉辦「生活照相館」活動，並獲東方日報慈善基金資助二萬元活動費用，冀藉着活動重新凝聚正面的家庭關係，為一眾家庭以鏡頭留住歡樂一刻，並收進相冊之中，讓各人透過相片不時回味思憶。記者：呂諾君、劉卓昕
「初初好唔捨得，佢喺陌生環境信唔過人就唔會出聲，又好易同其他人有肢體碰撞。」郭女士的女兒凱月自小有過度活躍及自閉症，坦言當日將凱月送入中心時大為憂心，但八年過去，凱月和中心職員漸漸熟落，關係猶如家人，「呢幾年我身體唔好，個女入嚟中心我多咗時間休息。見佢依家開心咗好多，今年開始仲有啲職業訓練，佢好有滿足感。」現時，郭女士每星期都會接凱月返家短聚一天。採訪當日，凱月亦把握機會與媽媽多多親近，拍照時更情不自禁如「樹熊」般環抱媽媽。
婉玲同樣已入住中心八年，母親賴太指出，因剖腹手術的麻醉藥過多，婉玲出生時腦部已受損害，此後一直未能控制身體，需以輪椅出入，亦不幸成為聾啞人士，「屋企個個都好錫佢，但我自己年紀大又周身病痛，真係湊唔掂。」
賴太數年前患上髖關節骨枯，日常照顧婉玲倍感吃力，因此得悉女兒能入住中心，亦感到非常高興，而且中心亦提供各樣的物理治療，婉玲現在已能站起身。
40家庭參與 大讚有意義
雖說中心職員照顧周到，惟平日需與女兒分離亦難免掛念，因此賴太大讚是次拍攝活動「好有意義」，「平時都少同佢影相，會郁來郁去好難影，今日除咗有專業攝影師，仲有啲姑娘阿sir引佢望鏡頭，好期待睇啲相！」
基督教懷智服務處美田綜合復康服務中心經理廖少冰表示，是次「生活照相館」活動有四十個家庭參與，共送出八十本相冊分別給予服務使用者及其家屬，希望藉活動貫徹「美田是我家」的目標，為使用者凝聚家庭關係之餘，亦能培養對中心的歸屬感，「對使用者嚟講宿舍算係第二個屋企，而隨住部分家屬嘅年紀愈大，使用者可能愈少返屋企，所以希望今次可以幫佢哋影低生活照，無時無刻都可以掛住家人。」