中環出更：工記擺年宵 學民黎踩場
維園年宵踏入第二日，工聯會（工記）為工聯職安健協會義賣籌款嘅檔口亦開張，仲邀請咗工聯會會長林淑儀同理事長吳秋北等人撐場，但原先都會落場嘅立法會議員王國興，就因為泛民「拉布」被迫困坐立法會缺席。咁啱路過嘅學民思潮黎汶洛同周庭即興踩場，不但初則口角，仲差啲埋身肉搏，學民真係未到猴年就先幫工記開年。
林淑儀致詞時祝願全港打工仔「有汗出、有糧出」、「萬事有『雙糧』」，但純粹路過檔口嘅黎汶洛同周庭就不滿工記對全民退休保障立場模糊，頓時由遊花市市民變身示威者，喺工記檔口高叫「支持全民退保」。林淑儀起初不知就裏，亦都跟住黎汶洛高叫「支持退休保障」，黎打蛇隨棍上再高叫「停建高鐵」、「停建大白象工程」，林淑儀先意識到呢位「粉絲」原來唔係自己友，即時收口。
吳秋北扮「聾耳陳」應對挑釁
輪到吳秋北為工記揮毫時，仲索性「聾耳陳」上身，懶理黎汶洛不斷高叫口號挑釁，亦無理會黎同工記成員互相推撞，只寫上「歲歲平安撐標時，家家和睦要退保」對聯，草草了結開幕儀式。難得吳秋北同林淑儀EQ唔錯，面對黎汶洛玩寸個場都蓮子蓉咁嘅面口，搞到黎亦奈佢哋唔何。
不過，林淑儀面對老公、進出口界立法會議員黃定光（象哥）應該更加無可奈何，事關象哥話要退下火線都講咗三屆，但每屆都係齋噏，林淑儀亦好無奈話，干預唔到象哥嘅去向，但就心痛象哥做議員太辛苦，搞到兩公婆連去旅行都要遷就立法會會期。唔知象哥會唔會乖乖哋放假畀黃太「成功爭取」一次呢？
卓妮