中環出更：卿姐訪緬 冀見昂山淑姬
緬甸新國會任期周一正式展開，聯合國就為當地國會議員做培訓，並邀請各地議會嘅議員去當地交流，民主黨主席兼立法會議員劉慧卿及獨立議員謝偉俊都係獲邀請人士。
同樣都係女性政治領袖嘅卿姐，就希望同昂山淑姬見面。據悉，現正幫聯合國擔任國際議會顧問嘅立法會前秘書長吳文華都會去幫手培訓當地嘅新丁國會議員。
盼鼓勵當地女性參政
卿姐話，自己兩，三年前已經去過緬甸，而緬甸國會去年十二月亦都嚟過香港，同香港立法會議員會面，當時佢都有出席。今次佢獲邀去緬甸，都好期待可以同昂山淑姬見面，並與其他新議員交流。卿姐下周五就會出發，預計逗留一個星期，本月十九日先返香港。
雖然緬甸係軍人政府，但卿姐話同香港議員監察政府嘅職能係一樣，所以希望去到當地，可以同佢哋嘅議員分享一下香港嘅情況、議員點樣質詢政府、議員操守同點樣避免利益衝突、以及鼓勵女性參與政治等。唔知卿姐同昂山淑姬見面時，會否惺惺相惜傾唔停呢？
卓妮