如果要選「醜聞王國」，民航處一定當之無愧，醜聞爆完一單又一單，而且鑊鑊新鮮鑊鑊甘，唔到你唔服！
嗱，醜聞王國又出事嘞。本報踢爆民航處空管中心淪為無王管中心，有主管級人員無視指引，當值時公然使用手提電話，搞到中心內嘅雷達及無線電被干擾，空管人員同機師嘅通訊經常「沙沙聲」同「ＶＶ聲」，萬一機師聽錯指令，分分鐘釀成空難都有之。最離譜嘅係，違規情況唔係偶一為之，而係持續超過一年，因為違規者位處高層，其他職員敢怒不敢言，既冇人勸止，亦冇人通報，簡直好似一個計時炸彈咁，遲早爆大鑊嘅咋。
講起真係諷刺，民航處本來係保障航空安全嘅部門，家陣居然變成危害航空安全嘅禍根。該處四年前豪花十五億元購置新空管系統，點知買番嚟至發現問題多多，安全成疑，睇得唔用得，焗住用舊系統頂檔至今，被指影響航空安全。殊不知一醜未完，一醜又嚟，今次唔止系統打柴，直頭成個空管中心出事，咁搞法，即係攞乘客生命較飛啫。航空安全唔係講玩，尤其香港作為國際航空樞紐，航班頻密，無數乘客嘅生命安全掌握喺空管人員手中，更加唔能夠有半點差錯。好似近年咁吖，全球發生多單航機事故，造成死傷枕藉，部分航機更加連屍骸都未搵番，民航官僚唔通咁都未知驚？
民航處管理混亂，新總部淪為「豪華娛樂城」，新空管系統淪為「廢柴系統」，早已臭名遠播，家陣連空管中心都淪為「無王管中心」，成個民航處簡直爛到入心。正所謂，上樑不正下樑歪，民航處處長羅崇文不務正業，唔搞到烏煙瘴氣至奇，佢返工一味掛住享樂，唔係為自己打造私人沐浴間，就係為老婆度身訂造跳舞池，搞到新總部變成蛇王俱樂部，邊有人認真做嘢吖。羅崇文帶頭腐敗，空管中心高層有樣學樣，呢啲咪就係蛇鼠一窩囉。
事實證明，港府話就話推行問責制，實情係「不問責制」。自從爆出連串醜聞，民航處先被審計署炮轟，再遭立法會狠批，依然死性不改，尤其係羅崇文，兩次被立法會政府帳目委員會發表報告炮轟，又「痛斥」，又「強烈譴責」，仲被狠批「故意疏忽職守」添，結果照舊庸官我自為之，明年退休仲可以一筆過拎走千幾萬退休金，咁叫問責咩？都好荒謬啫！
好明顯，成個民航處就好似一架無人駕駛嘅飛機，遲早闖大禍嘅咋，港府如果唔想陪葬，速速懲治羅崇文，或者可以避過機毀人亡嘅。