政情：公民講場：孭「鐵」鑊捱炳急釐清責任

廣深港高鐵香港段超支額不斷飆升，令總造價高達九百五十億元。運輸及房屋局局長張炳良喺電台節目上話，佢身為問責局長，唔會逃避責任，但就解釋高鐵項目係政府首次畀港鐵負責工程管理，而且仲係由上任局長鄭汝樺決定，事後回顧有關做法唔係最好，導致政府陷入被動。佢強調，政府只係工程嘅委託人，港鐵先係工程嘅管理人。張炳良咁講法，除咗要及早搞清楚角色同責任外，似乎都怨恨鄭汝樺留低隻「鐵」鑊畀佢孭咁喎。