政情：今日你上鏡：楊偉雄輕量級午餐養生

日常飲食習慣對身體健康有好大影響，行政會議成員兼行政長官創新及科技顧問楊偉雄原來都好注重飲食。前日我哋見到楊偉雄喺金鐘廊買午餐返辦公室開餐，但佢只係買咗一份三文治同一盒鮮果沙律，真係夠晒輕怡。佢話，平時習慣早餐同晚餐食豐富啲，如果中午冇午餐會或其他應酬飯局嘅話，都係食三文治加鮮果沙律，當係養生咁話，而呢個習慣都持續咗十幾年喇。除咗注重飲食，楊偉雄話平時都會打網球同做吓運動，睇嚟佢已經為加入政府熱廚房做好準備喎。