魚與熊掌往往不可兼得，話說新民主同盟（新同盟）西貢區議員鍾錦麟等五人，尋日去咗灣仔警察總部抗議，話警方曾承諾今年內把將軍澳分區升格為警區，但至今仍未兌現承諾，猛話警方「走數」，又話將軍澳嘅人口已到達四十萬，警民比例嚴重不足，擔心長遠會影響服務質素，促請警方遵守承諾，唔好再拖延把將軍澳分區升格為警區。
翻查立法會會議紀錄，原來同為新同盟黨友嘅立法會議員范國威，喺今年一月九日出席工務小組會議時，就同其他泛民議員一齊反對喺啟德行動基地重置東九龍總區。係人都知，東九龍總區依家就喺將軍澳警署，如果東九龍總區唔搬出來，將軍澳分區又邊有地方可以升格為警區呢？范認真矛盾。
但范國威就死撐，話將軍澳警署升格，同東九龍總區搬唔搬根本係兩回事，因為將軍澳分區升格為警區係軟件上增加人手編制，硬件可以維持不變，東九龍總區繼續留番係將軍澳都冇問題，仲話千祈唔好同土地問題掛鈎喎。不過，無地方又點樣容納到新增嘅警員呢？范國威真係搞笑，難為警方要硬食。