政情：論建制團結 孖田又對立
自由黨田北俊（田少）同新民黨田北辰（田二少）係現屆立法會內唯一「兄弟班」，上周剛剛就政改方案表決「甩轆」責任誰屬公開嗌大交。田少早前喺社交網上載咗張豬仔相，疑似譏諷當日拉隊離場嘅三十三位建制派議員係豬，變相鬧埋自己細佬。田二少就反擊指自由黨等八名建制派議員，當日無跟大隊離開會議廳，先係「甩轆」事件嘅元兇，即係插番大佬。尋日田氏兄弟又分別上電視同電台講述「甩轆」事件中，建制派團結嘅問題時，雙方又再公然對着幹。
田少喺節目中直認建制派唔及泛民團結，又澄清當日擺隻豬上網，純粹想「呃Like」及針對「甩轆」事件兩大關鍵人物、經民連林健鋒同民建聯葉國謙，無意指所有離席建制議員都係豬。
兄弟鬩牆 各不相讓
不過，田二少喺電台訪問中就話，「甩轆」事件起因，並非建制派唔夠團結，而係正因為太過團結，先至搞到葉國謙等人帶頭拉隊離場，包括佢在內嘅部分建制派議員最終都跟咗大隊離開，缺乏「執生」嘅勇氣。
其實睇真啲，雖然田氏兄弟今次嘅言論表面上有矛盾，但實際上並冇衝突。田少覺得建制派唔團結，主因就係佢自己同自由黨成日唔跟建制派大隊。而田二少覺得建制派好團結，皆因佢根本冇當自己大佬同自由黨喺建制派一員。正如中聯辦主任張曉明所講，賣燒餅嘅同賣棉被嘅，寒風下在破廟相遇，兩人互不相讓扶持，遲早實一個凍死，另一個餓死！