政情：大口湯劈炮也「甩」轆
身為資深大律師、兼且做過大律師公會主席嘅前公民黨（公文袋）立法會議員湯家驊（大口湯），又再記錯法律，將本應遞交畀立法會秘書嘅辭職信，寫錯咗畀立法會主席曾鈺成，需要明日再辭多次職「補鑊」。連自己辭職都搞到「甩轆」，真係應該用「失敗」嚟形容嘞！唔知曾鈺成會否透過WhatsApp贈番佢一句：「玩乜？！」
須向秘書遞函 明日補鑊
大口湯上周一（廿二日）宣布因政改立場同其他路線問題，退出佢有份創立嘅公文袋，並同時向立法會主席遞交辭職信，預告喺今年十月一日起辭任立法會議席。不過，大口湯尋日突然喺電台同社交網站自爆，原來法例規定立法會議員辭職，必須向立法會秘書遞信，因此佢日前向主席遞交嘅辭職信，喺法律上根本無效。佢強調自己唔會反口食言，明日會重新向秘書補交辭職信。
《立法會條例》第十四條規定，任何議員可隨時藉向立法會秘書給予書面辭職通知辭去議員席位，而辭職信必須附有議員親筆簽名，並且訂明辭職嘅生效日期。記得喺一○年嘅「五區公投」中，大口湯當年嘅黨友梁家傑同陳淑莊，亦係直接向時任立法會秘書長嘅吳文華遞交辭職信，其中陳淑莊仲一度攬住吳文華喊添。如果大口湯連咁都唔記得，可見佢有幾關心自己啲黨友。
被爆僭建 亂引案例認衰
其實今次並非大口湯首次記錯法律。幾年前大批高官與議員被揭發有僭建時，大口湯位於大埔康樂園嘅寓所，亦被傳媒踢爆有多項違規建築。佢起初死撐自己打過一單僭建官司，堅稱其寓所嘅僭建物屬於法例豁免範圍，唔算違法，毋須清拆。不過，翌口即有法律界朋友「點醒」佢，話佢提及嘅裁決其後已被上級法院推翻，大口湯惟有「認衰」自認記錯法律，並急急搵承建商清拆有關僭建物，認真羞家。
此外，大口湯辭職後，佢做開嗰個內務委員會副主席職位就要再選過。梁家傑尋日透露，雖然建制派肯畀番個位泛民做，但係就點名話唔可以係民主黨單仲偕或公共專業聯盟梁繼昌。梁繼昌做人事編制小組委員會主席時狂玩建制派，建制派對佢有意見並唔出奇，但單仲偕一向同建制派關係唔差，咁都要封殺，唔通政改方案否決後，有人已將整個民主黨剔除出溫和泛民名單？