中環出更：劉吳惠蘭入馬場撐愛駒

四年前因為切除結腸腫瘤，需要跟進治療同調理身體而請辭嘅商務及經濟發展局前局長劉吳惠蘭（Rita），去年久休復出接任公務員敍用委員會主席，退居幕後掌握高級公務員升遷大權，已經甚少公開露面或點評時局。不過，卓妮尋日罕有撞到Rita同丈夫孖住現身沙田馬場，沿途仲有傾有講，而且相當精神添。

卓妮喺馬場離遠見到劉氏夫婦，雖然久未露面嘅Rita戴咗黑超，但驟眼望落去精神相當唔錯，身形亦無乜點變。佢哋行經售賣馬會精品嘅地方時停低睇咗一陣，似乎對紀念品幾有興趣，但佢哋最終冇買嘢就行開，直接上咗馬主廂房。卓妮原本諗住等完場先同佢哋傾吓偈，但最終無再碰到面。

不過，其實Rita現身馬場都唔出奇，因為佢早前同老友、公務員事務局前局長俞宗怡合組「新秀團體」做馬主，名下幾隻「勝任」字頭嘅馬匹都相當旺場。尋日佢哋隻「勝任如意」咁啱有賽事，相信佢都係親身落場打氣，可惜最後三甲不入。

卓妮