中環出更：WhatsApp易洩密 皇子寧棄用
政改方案表決期間發生建制派集體離場「甩轆」事件，日前仲爆出佢哋嘅WhatsApp群組對話外洩。卓妮尋日去沙田馬場遇見唔少名人，都對WhatsApp呢類即時通訊程式又愛又恨，貪佢方便但又怕麻煩兼易洩漏私隱，其中鄉議局主席劉業強（Kenneth）更話WhatsApp群組愈開愈多，有時索性唔睇唔覆，寧願好似爸爸劉皇發咁唔用WhatsApp，有咩直接用電話講。難怪政改表決當日大家都要「等埋發叔」喇！
Kenneth解釋，好多同事、朋友都會搵佢加入群組吹水傾偈，有時開完會一睇電話，已經有幾百個未讀訊息，要全部睇晒相當費時，更試過因為咁而錯過咗改期開會嘅通知。
莊偉茵清除群組免後患
最近連港區人大代表嘅對話內容都外洩，身兼全國政協委員嘅Kenneth話，省級政協之間的確有個群組，但全國政協就唔覺有喇，笑言可能係同事冇邀請佢加入，但就唔擔心有「鬼」喎。
中電企業發展總裁莊偉茵（Quince）尋日同丈夫罕有帶埋大仔Julian現身馬場。Quince坦言，由於中電接觸好多客戶資料，所以內部一早已經有指引處理敏感通話或訊息，好似每次都為中電活動開一個新嘅WhatsApp群組，事後即時清除群組免後患，而涉及客戶資料嘅溝通更加唔會用WhatsApp處理，所以唔擔心資料外洩。
留學澳洲嘅Julian難得放假返港陪父母。原來Julian讀完學士後，繼續喺澳洲國立大學修讀公共衞生碩士。問佢會唔會考慮回流工作？Julian話計劃兩地搵工，視乎邊度有公司聘請。
香港賽馬會副主席周永健就話即使有裝WhatsApp都唔多用。佢自嘲係老人家，開會做緊正經嘢時唔鍾意畀電話訊息騷擾，平時亦唔會用WhatsApp同人傾閒偈，莫講話擔心被人睇到佢嘅私隱嘞。
卓妮