中環出更：廠商會密謀進駐邊境購物城
剛過去嘅復活節長假內地訪港旅客大跌，引起各界高度關注，原因同早前激進嘅反水貨客行動不無關係。由立法會進出口界議員黃定光（象哥）牽頭嘅邊境購物城雖仍待批准，但象哥亦同時密鑼緊鼓進行招商，早前就向中華廠商聯合會（廠商會）招手，初步反應正面。
廠商會會長李秀恒（Eddy）尋日出席香港名牌冠玲瓏活動時話，象哥早前與廠商會開會介紹過邊境購物城概況，希望廠商會旗下嘅品牌局以及舉辦工展會嘅展覽服務公司，可以組織香港名牌及廠商齊齊共襄盛舉。Eddy話，購物城除咗可以畀水貨客入貨之外，亦可趁機推廣香港品牌，所以待租金、經營模式等詳情進一步清晰後，即可向參展商廣泛諮詢及招商。
唔怕搶工展會客源
同場嘅廠商會展覽服務公司主席兼廠商會副會長戴澤良（Tony）就話，部分工展會參展商初步反應唔錯，佢同象哥正緊密溝通細節。
按照規劃，邊境購物城共有大約三百八十幾個貨櫃攤位，Tony話，如果一切順利，希望可以租用五十至一百個攤位。佢仲話，唔擔心邊境購物城會搶咗工展會客源，事關內地客只佔工展會入場人數不足三成。
卓妮