日本有位女死囚，幾年前殺咗三個交往中嘅男朋友，咁恐怖嘅女人竟然嫁得出？台灣網友熱烈討論女生為甚麼出國旅遊多過男生？唔知大家又點睇呢？美國有位婆婆日日都要食小鮮肉，真係年輕帥哥嗰隻，問你服未？
日本有位49歲嘅女殺人犯喺2009年半年間透過相親活動，先後謀財害命咗三個男子，被捕後被判死刑，但執行日期一直未落實，於是就喺獄中服刑，而佢更用自己個名開咗個網站，分享佢喺獄中嘅生活點滴，照計咁嘅女人係男人都怕咗佢，但喺2013年竟有一名60歲嘅男粉絲，寫信去監獄願做佢嘅筆友，兩人雖然只透過書信溝通，但感情一日千里，今年3月更傳出喜訊，兩人喺獄中舉行咗婚禮，好多人都唔明白，但你唔好理，寃豬頭都有盟鼻菩薩！
台灣最近最火熱嘅網上話題，一定係台灣女生為甚麼出國旅遊比男生多？而最先發貼嘅網友仲歸納咗兩大原因，第一女生比較爽，第二女生愛貪慕虛榮，可能大家唔係好明，等我解釋一下啦！女生好爽係指生活冇乜壓力，打工賺到錢除咗畀部分父母，大部分都可以要嚟自己用，特別有男朋友，娛樂、購物、飲食都慳好多；第二就係貪慕虛榮，講女生喺分享網冇乜好炫耀，於是一年內幾大都出國玩吓，至少可以晒命晒番一年半載，聽落又幾有道理！
講都冇人信，話說加州有位80高齡嘅婆婆，自爆曾同一千個男人發生性關係，而年紀最小嘅只得18歲，而大家咪以為呢位婆婆講嘅係陳年往事，原來全部都係呢十零廿年發生嘅事，婆婆雖然上咗年紀，但十分享受同年輕男士發生關係，為咗多啲機會，佢仲喺2008年開始兼職拍三級片，又話有一次曾同15位嫩男一齊共度春宵，真係估佢唔到。此外，目前婆婆仲有一位31歲嘅男朋友，成日向佢求婚，只係婆婆話自己唔想定落嚟喎！服未？
撰文：小德