中環出更：自信勝鬚眉 女強人Ready議政
女性參政，歐美成風盛行，早前施政報告都提到，今年會委任更多女性出任諮詢及法定組織成員。發揮空間大咗，城中一班事業女性深表支持。合和實業主席胡應湘太太胡郭秀萍話，時下女性獨當一面，專長廣泛，莫講話參政，就算喺地盤工作，一樣有用武之地。
香港各界婦女慶祝三八國際婦女節，早前喺中環舉行遲來的酒會，話題離不開講下「女高管問題」。環顧全球及亞太區高級行政人員行列中，男人仍然多過女人三倍。睇番香港，「女高管」比例唔算失禮，但相比女高管最多嘅俄羅斯，仲有段距離。胡太就贊成畀多啲機會女性議政，認為佢哋天生心思細密，可以補男士嘅不足。
擔任唔少公職嘅東華三院前總理林李婉冰都話女性議政係好事：「開會有女人喺度，氣氛會中和啲，女人睇事情，亦較顧存大局。」「美容教主」鄭明明一早活躍於內地政商界，佢話女性社群影響力愈來愈大，呢股力量絕對不能忽視，故廣納更多女政客，係明智嘅做法。
諗法細膩 顧存大局
一句講晒，開會多幾把女人聲，並非只得一個墟嘅。仁濟醫院董事局主席蘇陳偉香認為，女性喺制訂教育、青年人及長者政策時，會有細膩嘅諗法，決策結果更易為大眾接受。港島婦女聯會副主席林玉茵鼓勵青年女性多參予社會團體及公職，放眼世界。不過，佢坦言公職多咗就要犧牲唔少購物時間，相信要等到出差先可以偷閒行街Shopping喎。
卓妮