中環出更：立會打邊爐葉建源教壞細路

無視嚴禁煮食規則

我哋收到投訴，尋日下午十二點幾鐘，有泛民議員助理喺九樓其中一個較大嘅茶水間打邊爐，保安人員迅即趕到現場巡視，並勸喻對方唔好喺茶水間打邊爐。初時有人以為違規分子係民主黨議員助理，但該黨發言人澄清佢哋助理當時只係喺寫字樓內食飯盒，並無去茶水間打邊爐。後來有人報料，涉事者其實係葉建源同其助理，我哋打過畀葉建源問係咪真有其事，但截至截稿前未有回覆。

秘書處回覆話，根據立法會辦事處指引，議員辦公室所有房間嚴禁煮食，連用電磁爐都唔得，又話秘書處巡查時發現有一名議員及三名議員助理在茶水間內打邊爐，當時已經即時作出勸喻。其實社民連「長毛」梁國雄嘅辦公室試過有人吸煙導致火燭，而民主黨胡志偉又試過喺大樓內測試柴油發電機，搞到廢氣蔓延至多個樓層，估唔到啲泛民議員至今仍未識吸取教訓。