香港自詡國際大都會，港人嘅英語水平理論上應該有番咁上下，實情又係點？嗱，有物流業主管爆料話，見過一位八十後同行同外國客食飯，問人客「eat what（意即「食乜嘢」）」，搞到成枱人呆晒。見微知著，所謂香港國際大都會，其實都係自欺欺人嘅咋。
港人英語水平下降，其實早就唔係新聞嘞。前排有教育機構調查發現，香港在職成年人英語水平比舊年急跌九位，全球排第三十一，僅屬「中級水平」，輸老對手新加坡九條街不特止，更首次被北京、上海同天津等內地城市爬頭。今次已經係香港連續第七次評分下跌，簡直醜死怪吖！
更丟架嘅係，唔止一般行業人士嘅英語不濟，連對英語能力要求較高嘅律師行業，一樣唔好得去邊。有人喺庭上口語文法錯漏百出，甚至連陳述案件最基本嘅動詞時態都出錯，搞到畀法官問番轉頭，要求釐清原意。英語咁水皮嘅律師，莫講話幫唔到委託人，分分鐘無罪搞到變有罪添呀。
因乜解究港人英語水平不進反退呢？有英語培訓機構係咁講嘅，佢哋嘅在職學生由十年前佔七成，減到依家得番四成，原因係唔少打工仔經濟相對穩定，自我增值意識鬆懈，加上中港往來頻繁，內地發展機會多咗，好多人寧願自資學普通話，反觀內地居民學英語就愈來愈積極，此消彼長，香港有乜辦法唔落後吖！
講真，同時學好兩樣語言，唔係話冇可能，睇吓有冇心嘅啫。好似老一輩香港人咁吖，無論學習條件定師資都差過依家多多聲，咪一樣可以將香港發展成為國際金融中心同航運中心。所以話啫，「重普輕英」只係港人英語退步嘅其中一個原因，關鍵係嗰陣嘅香港人唔會怨天尤人，而係抓緊機遇，自我增值，所以咪成功囉。
話時話，今時今日，香港社會泛政治化，樣樣唔掂，點止英語水平打倒褪咁簡單吖。校園更加淪為重災區，有啲老師唔似老師，有啲學生唔似學生，唔少年輕人無心向學，沉迷政治，以為做街頭鬥士，好勇鬥狠就有前途。出到嚟打工嘅，又個個想走捷徑，不問付出，只問收穫；不問責任，只問權利；不理他人，只顧自己；有啲人寧願花成個鐘上網發洩對現實嘅不滿，都唔肯花一分鐘學多兩個英語單詞，咁搞落去，就算有向上流機會，都冇資格同人爭喇。
點講都好，一分耕耘，一分收穫，呢個世界冇免費午餐嘅。功夫茶都係嗰句，無論政府定政客，統統都靠唔住，想有好日子過，只有自強不息一條路，港人係時候醒喇！