探射燈：跟風瘦身特訓 7分鐘損膝大

源自美國的HIIT運動是結合帶氧運動及阻力訓練，配合高強度及極短的休息時間，改善心肺功能及肌肉力量。最近網上流行多種由不同難度動作組合而成的HIIT運動，其中以「七分鐘運動」最為流行，訓練由十二組動作組合而成，包括Crunch（捲腹）、Lunge（弓步）、Squat（深蹲）、Plank（棒式）及Push Up（掌上壓）等。

OL：上網睇video學

亦有教學短片加入難度較高的Squat Jump（蹲跳）、Jumping Lunge（弓步跳）及Burpee（波比跳）等。每個動作要持續三十秒，每完成一個動作後休息十秒，再進行下一組動作，每日進行二至三輪。惟部分片段未有警告字眼及加入熱身運動環節。

（正確）Burpee（波比跳） 蹲下重心向後，膝蓋勿過分傾前。

黃家灝

經常久坐的OL Cecilia早前亦曾跟隨熱潮進行高強度間歇運動，希望強身健體及達致消脂修身效果，惟進行數次訓練後感到身體不適，「初頭幾個朋友去上啲HIIT堂，有時又上網睇啲video，上過幾堂後膝頭唔舒服，覺得痛要去睇醫生。」Cecilia其後向醫生求診，經醫生診斷後，認為Cecilia運動的姿勢不正確，導致關節受損，需要暫停運動。

（錯誤） 做掌上壓時，手臂過分展開，臂部容易受傷。

（正確）Push Up（掌上壓） 微張開兩手至膊頭水平。

「平時有跑步都頂唔順」

Cecilia指，HIIT的訓練動作看似簡單，誤以為自己有能力完成，「啲動作望落去好似好簡單，同埋當一班人去做，自己就想做好啲，會出力啲。但其實自己唔識運用肌肉，啲動作唔啱，就咁傷咗。」Cecilia表示，為了避免受傷，會找專業人士指導。

（錯誤） 膝蓋向內側。

（正確）Jumping Lunge弓步跳 膝蓋呈水平線。

另一名亦曾進行HIIT運動的阿Yan亦指，由於網上流傳每日進行七分鐘高強度間歇訓練，就能有效減肥，故此她亦跟着網上影片在家進行訓練，惟完成一組訓練後，開始感到頭暈，未幾更嘔吐，「我平時都有緩步跑，冇諗過都頂唔順，仲要做咗排都冇咩效果。」

市民點睇 張同學（大學生）：「我都有跟過網上啲片做運動，有啲話訓練局部肌肉，但唔係好work（有效）。我有打開排球，有運動底子，唔係太怕會傷。」

市民點睇 余同學（大學生）：「有上網睇過吓啲教健身嘅影片，但冇跟住做。自己有做開gym，每次都起碼做成個鐘先得，知道冇可能咁短時間可以操到肌肉。」

心肺功能弱隨時猝死

健身中心高級私人教練黃家灝解釋，HIIT原是為運動員設計的訓練系統，增強運動員的最大攝氧量，以提升比賽成績，「做HIIT冇問題，但本身要好fit，有一定體能先好做。」他指，由於HIIT訓練進行期間，運動員要在三十秒內「谷到盡」，人體的最高心跳率會達致百分之九十或以上，心跳率分分鐘達致每分鐘二百多，心肺功能稍弱或心臟有問題的人士，容易引致身體不適，甚至猝死。

至於動作不當，亦會導致肌肉及關節受傷。黃家灝指，HIIT訓練的動作大多為跳躍動作，其中以蹲跳、弓步跳及波比跳等較難掌握，姿勢欠正確或肌力不足，落地時膝頭關節承受巨大壓力，久而久之，膝頭關節因而受損，「好多時坐得多辦公室，背、臀等肌肉好少運用，已經好緊，再加上姿勢唔啱咪易傷。」

骨科專科醫生張啟然指，人體的骨骼及軟組織所能承受的壓力有限度，肌肉訓練不足，再加上運動姿態不當，超出骨骼及軟組織受壓程度，便會導致肌肉拉傷及關節受損。他提醒，市民未經專業訓練便貿然進行高強度間歇運動，隨時令膝關節、椎間盤、踭關節受損，「過去因為運動而受傷嚟求診嘅情況普遍，市民進行高強度運動前要先尋求專業意見，評估有冇傷患、心肺功能程度等。」

圖／文：溫盈盈