政情：方剛唔想做「最短命」黨魁
立法會議員田北俊（田少）被踢出全國政協後，連自由黨黨魁都一併辭任埋，黨領導層因而作出「微調」，尋日宣布由方剛接棒黨魁、鍾國斌升格任主席，邵家輝任副主席，而田少就再度夥拍周梁淑儀同劉健儀出任榮譽主席。外界盛傳立法會議員林大輝「如無意外」最快下月入黨、甚至做埋黨魁，可惜方剛表明唔想做最短時間嘅黨魁，最多安放大輝喺新界東喎。
田少因做「壞孩子」敢言而惹出局之禍，方剛表明唔做「田少二號」、甚至田少嘅扯線公仔，笑言「今時今日要我扮田少角色，我點識扮呢？扮出來都唔似囉！」堅持以其作風處理黨務。
無意為大輝再改選
過去幾年，田少一直想大輝入黨，屬意對方接棒黨魁兼出戰新界東直選，傳聞亦開始轉入大直路。不過，啱啱升格黨魁嘅方剛話，個人好樂意退下來，「但（做黨魁）一個月好似短咗啲囉」，無意為咗大輝再改選，只係話大輝「喺新東比較着重啲」。照咁睇，大輝明年入黨做黨魁嘅如意算盤似乎打唔響喇，唔知會否影響佢入黨嘅意願呢？