政情：超級看更 立會維安

秘書長親自督師

仲記得早前一批示威者衝擊大樓打爛至少兩塊玻璃，被狠批係「暴徒」行為，大樓保安再次成為外界焦點，適逢「雙學」事先張揚前晚發動「最後一擊」，據聞Kenneth都唔敢怠慢，前日下晝四點喺立法會親自督師跟進最新情況。直至尋日凌晨四點左右先回家稍事休息，前後直踩十二粒鐘。但冇幾耐，佢朝早六點半又返番立法會坐鎮。同一時間，據講立法會總保安主任亦有「通頂」留守，直至尋日朝早十點先走。

Kenneth承認，前日下午開始留守立法會，自言要親身喺現場了解情況先至放心，期間同總保安主任商討及預計可能會發生各種情況，以及相關應對策略等。當問及係咪無乜時間瞓覺休息，佢話秘書長房間有梳化可以瞓一陣，自己亦有準備睡袋，但就算瞓都只係敢小睡片刻，一陣瞓大咗出事就麻煩。據知，立法會副秘書長林鄭寶玲尋晚會接替Kenneth，負責喺前線應對一旦出現嘅突發事件。

削出入口兼鎖升降機

立法會大樓亦因應最新情況加強保安，據知大樓合共四個出入口，依家只開放一個，並需要拍卡或登記才可進出。為防有人裏應外合突擊佔領會議廳，據聞連大樓內電梯都有特別安排，其中較近會議廳嘅三部電梯會封鎖前往會議廳、秘書處等樓層，要乘搭較遠的電梯先可前往會議廳。不過，行管會一日唔限制議員夜間帶訪客出入大樓，一日仍存在危機。議員夜晚仲帶訪客去辦公室開會？乜佢哋有咁勤力嘅咩？