中環出更：胡曉明：違法教職員應請辭
大學生喺畢業禮台上舉黃傘抗議嘅行動變本加厲，多間大學校長對於學生呢種表達方式一直都好寬容，直至浸會大學校長陳新滋出手，拒絕向舉黃傘上台嘅學生頒發畢業證書。身兼港區全國人大代表嘅城市大學校董會主席胡曉明，尋日亦開腔話學校對教職員違法唔會好似處理學生咁寬鬆，如果一旦被定罪藐視法庭，就唔應該從事教育工作。
盼學生尊重學校
胡曉明尋日喺電台節目上話，城大一直都畀學生自由表達意見，學生喺畢業袍上亦有掛飾物嘅自由，上台時如行為唔太過分都無所謂，希望學生尊重學校以及其他學生。佢又話，如果學生一旦被法庭定罪，甚至判刑，城大會作個別處理，可以返學校嘅都會畀佢返，希望循循善誘令學生返回正途。
不過，城大對於教職員就唔會咁寬鬆喇，如果教師被判藐視法庭罪，就唔應該從事教育工作，但佢話學校設有紀律委員，會就事件嘅嚴重性作討論，再向校方提出建議。唔知香港大學校長馬斐森同中文大學校長沈祖堯係咪都應該倣效城大嘅做法，對處理違法嘅教授表態呢？
卓妮