政情：滾湯淥腳 徐英偉入廠

近日政府高官為咗處理佔領行動忙到無停手，民政事務局政治助理徐英偉（Caspar）難得唔使加班，尋晚就同太太慶祝五周年結婚紀念，正當喺屋企食飯撐抬腳時，菲傭唔小心將成壺熱湯倒咗落佢大髀度。Caspar開頭諗住塗藥膏無事，點知發覺成隻大髀紅晒，最終要去醫院洗傷口，估唔到一個結婚周年紀念要喺醫院度過。Caspar話，佢去到醫院都被姑娘鬧，話淥親腳後唔應該亂塗藥膏，好容易會令傷口繼續惡化，雖然依家唔使瞓醫院，但未來幾日都要去醫院洗傷口至得。不過，佢話今次算好彩，壺熱湯只係淥到右腳大髀，如果再淥上少少就不堪設想，仲話事後家中菲傭仲驚過佢，搞到佢反而要花時間安慰菲傭至得。