政情：今日你上鏡：星之子不談政治

「星之子」陳易希當年憑一項發明，獲美國一間大學用佢姓名命名小行星，後來更獲科技大學破格取錄入讀電子及計算機工程學士課程。轉眼間，佢畢業後同朋友合資開辦嘅應用程式開發公司亦已經營運咗三年。尋日陳易希同友人及同事現身港鐵香港站開餐，離開時問佢有冇參加佔領行動，佢只係好簡短答話「冇」，然後身邊一位着花裙嘅女士好主動咁搶答：「我哋反佔中o架，做生意嘅只希望香港繁榮穩定！」記者繼續追問陳易希點睇學生佔領行動，點知佢朋友繼續搶答話：「唔會答，冇政治立場！」最後陳易希以趕住開會為理由，講咗聲再見就走咗喇。