政情：戴領去飲 泛民想散席

自己倒米：策略失敗

戴耀廷喊佔中已經好耐，但佔晒上下左右都未佔到中，反而走去搞毅行爭普選、民主登高、剃頭明志同明日嘅黑布遊行，全部有頭威冇尾陣。多個泛民黨派對一系列佔中「前菜」都冇乜胃口，直言浪費時間兼消耗意志，但都要焗住畀面派人撐場。據知佔中方面原本屬意民主黨劉慧卿同公民黨余若薇兩位「阿姐」剃頭，真係冇嗰樣整嗰樣，兩位阿姐梗係睬你都傻啦，而大部分泛民議員都唔見影。

除咗「前菜」冇味，戴耀廷多次失言亦玩到泛民陀陀擰。舊嘅唔講，好似人大公布政改框架後，一路以來壯志豪情嘅戴耀廷忽然悲觀，搶先向國際通訊社彭博（Bloomberg）自招佔中策略失敗、佔中人數可能減少，咁樣幫自己倒米，嚇到泛民Ｏ晒嘴，佔中秘書處亦不得不急急發聲明澄清。

三子「閂房門自己傾」

戴耀廷日前仲「打倒昨日的我」，話佔中一開始已經唔係以「癱瘓」中環為目標，又爆響口稱佔中以「去飲」為代號。有人就質疑，公開以「去飲」為代號，咁仲係咪一個代號呢？佢哋不滿戴耀廷衰衝動，想講就講、想做就做。有佔中核心成員更透露，所謂「去飲」都係睇報紙先知，暗批佔中三子有咩都閂埋房門自己傾，逕自打開口牌，冇理會同路人感受。

搞佔中搞到咁騎呢兼進退失據，難怪唔少泛民中人都想快啲上埋「主菜」，佔中過後就輪到政黨自己發圍喇！照咁睇嚟，其實泛民團結都係得個講字，講到尾都係為咗自己利益啫！