政府推出穩定樓市雙辣招，但市民唔怕辣照買，令樓價接連破頂，就連前立法會議員李華明都無懼入市，遠期樓花都照殺。話說尋日肥仔明同太太、囡囡一齊去抽將軍澳區新樓盤天晉IIIA期，仲畀囡囡抽中一個售價近二千萬元嘅單位，據講係5B座高層特色戶，實用面積1137呎，連一個一百呎嘅平台。估唔到肥仔明唔做議員走去開顧問公司，短短兩年間就買到二千萬新樓，仲要樓價唔貴唔買，莫非家吓真係咁好搵？
肥仔明話，今次係佢屋企首次買新樓，估唔到都抽得中，會一家人一齊供喎。其實佢哋依家都租住緊呢個樓盤嘅第一期一個單位，呢個樓盤嘅第二期都仲未入伙，但早兩年已經賣晒所有單位喇，而今次佢哋入手係第三期單位，雖然要兩年後先落成，但同第二期一樣咁搶手，佢哋抽到已經係「次理想」嘅單位喇。話晒都係遠期樓花，真係唔擔心樓價跌？肥仔明話，佢都唔係炒樓，所以個樓市升跌都唔關事喎。