笑一笑，十年少，笑口常開係長壽秘訣之一。成日谷住道氣，命都短幾年喇。道理人人都懂，問題係，港人日子愈過愈艱難，尤其係長者，不少面對老無所養嘅困苦，一殼眼淚，點笑得出吖。
嗱，有關注團體做咗一項針對長者幸福指數同對社區設施滿意度調查，約三成受訪者表示，感到幸福嘅時間唔到一半，即係大部分時間都唔開心。近一成半人話，唔見社區張貼適合長者參與活動嘅資料；兩成人話乘搭公共交通工具時冇人讓座；兩成話住所冇足夠防滑防跌設施；超過三成五話，攞住重嘢嗰陣冇人主動幫手。
呢班長者感覺唔到幸福，係成個社會氛圍出咗問題，尤其係港府冷血涼薄，安老養老大隻講，講難聽啲叫「帶頭虐老」，你話喺咁嘅環境下，老人家心情點可能靚吖。
提起安老政策，功夫茶即時火遮眼。老有所養，老有所居，老有所醫，講得好聽吖，可惜港府冇一樣做得到。堂堂國際大都會，連完善嘅安老制度亦欠奉，長者貧窮問題不斷惡化，唔少老人家靠拾荒度日，甚至為爭紙皮喺街頭打交，簡直係香港之恥！
長者居住問題同樣嚴重，無論公屋上樓定輪候宿位，都令公公婆婆失望，甚至可以講係絕望。嗱，當局承諾申請公屋平均三年可以上樓，但係就成日「彈票」。有住喺劏房嘅患癌長者等到心灰意冷，擔心到上樓嗰陣已經「冇命住」，亦有人輪候五年，都仲係望天打卦。仲有吖，安老宿位長期短缺，但當局成日諗縮數，唔肯增撥資源，家陣輪候資助宿位嘅長者已累積到三萬人，平均輪候時間長達三年以上，每年有數千位老人家喺輪候期間含恨而逝，真係諗起都心酸。
年紀大，機器壞，睇病難更加困擾長者，好多專科門診輪候時間係按年計算，大吉利是講句，輪得嚟唔止蚊都瞓，蛇都死，連人都唔掂喇。當局唔肯從根本上解決問題，淨係派幾張醫療券就想敷衍長者，有冇涼薄啲吖！
安老政策天殘地缺，處處甩漏，最攞命嘅係，生亦難，死亦難，百年歸老之後，入土為安同樣艱難。由於公營骨灰龕供應奇缺，一位難求，造就私營骨灰龕場大行其道，坐地起價，一個龕位郁下幾萬甚至幾十萬，問你點頂？
二千年前，孟子就話過老吾老以及人之老，弊在一提到為安老作出承擔，當局就牙痛咁聲，諸多推搪。作為老有所養最起碼一步，推動全民退休保障社會早有共識，但港府就一味玩拖字訣。唔通要公公婆婆篤住拐杖，推住輪椅佔領政府總部，你班忤逆港產官僚至肯做嘢？