政情：公民講場：戴耀廷籲警 清場前諗一諗

部分泛民人士及佔中示威者，批評警方處理七一預演佔中清場時使用過分武力，「正牌」佔中發起人戴耀廷尋日就撰文為前線警員平反，讚揚佢哋清場行動克制、專業同達到國際標準。但戴耀廷其後筆鋒一轉，又話唔認同警務處處長曾偉雄日前所講，話警員嚴格依法執法，就唔會出現違背良心問題嘅說法，強調法律之中亦有惡法，即使係善法亦有惡意執法，呼籲警員喺行動前先嘗試了解吓佔中嘅背後理念喎。不過如果每名警員喺抬人離場前，都要停一停、諗一諗先執法，肯定抬足幾日都清唔到場，變相幫咗班示威者阻塞中區交通。