行政會議成員、總商會議員林健鋒（Jeffrey）最近接連獲政府委任重要公職，繼早前獲政府續任盛事基金評審委員會主席後，最近又被委任為機場保安有限公司主席，換言之，Jeffrey以後就要金睛火眼睇實同機場保安有關嘅事宜嘞。仲記得早前爆出時任機場保安行政總裁嘅周富祥擅自申領「補水」幾十萬元醜聞，唔知道Jeffrey上場之後諗住點樣撥亂反正呢？
有知情人士話，過去多年機場保安主席一職都係由機管局主席兼任，底因係呢個職位知悉好多涉及機場嘅敏感資料，點都要搵個信得過嘅人出任，由於行政會議前成員張建東早前以私人理由，一併喺以上兩個職位退下火線，因此呢個職位一直懸空。
按照過去不成文規例，機場保安主席理應由上月接任機管局主席嘅羅康瑞接手，但據聞對方覺得機場保安主席呢個位太花時間同精力，加上自己只係出任機管局主席一年，因此原屬「唐營」嘅Jeffrey，才會冷手執個熱煎堆接掌機場保安呢個重任。
另外，羅康瑞同立法會議員麥美娟一同獲政府委任為大嶼山發展諮詢委員會新成員，任期直至一六年一月底。