上次立法會答問大會，一眾泛民議員衝晒出位包圍特首舉牌示威，原因之一係佢哋早已喺之前嘅答問大會用晒啲提問配額，好難再有機會被點中發問，所以惟有靠衝出座位博曝光。類似場面可能會喺今日下午嘅內務委員會政改報告特別會議重演，因為班泛民議員又係十居其九都冇機會提問，唔搞嘢就冇機會見報，政改三人組真係要小心啲喇！
今日嘅特別內會只得兩粒鐘，估計政改三人組起碼要用半粒鐘介紹報告內容，加埋可能有人示威、掟嘢及提出規程問題等，可能得番個多小時提問！根據過往會議嘅經驗，預料只夠約十名議員提問。而睇番六十九名議員喺過往特別內會嘅提問紀錄，一共有十一名議員從未問過問題，照計可獲優先發問，其中十人都係建制派，泛民只得民主黨涂謹申一個，如果主席梁君彥執正嚟做，泛民實冇乜機會問嘢。
唔知係咪因為呢個原因，廿多名泛民議員尋日就發表聯署聲明，要求政改三人組喺特別內會之後，再親臨下周一嘅政制事務委員會例會或再另行安排會議，畀多啲議員發問。