政情：商場爆玻璃 怪醫險中招
意外嘅嘢就係難以估計，話說「怪醫」醫學界梁家騮幾日前一家大細遊數碼港，點知當佢哋打算走嘅時候，眼前嘅玻璃突然破裂，而喺「怪醫」對面、正準備入商場嘅一個中年男子就不幸被玻璃割傷流血。雖然「怪醫」冇被波及，不過佢都即時發揮醫者父母心嘅本色，幫助該男子止血，然後再打電話報警求助。
囡囡嚇到喊
正所謂「有圖有真相」，「怪醫」嘅太太尋日喺社交網站上載幾張相，將呢個意外場面圖文並茂呈現大家眼前。「怪醫」太太憶述，佢哋當時分兩批離開數碼港，其中一個小朋友同菲傭率先走咗出去，佢為咗將最細嘅囡囡放喺BB車上面，所以就遲咗幾秒出去，因而避過一劫，不過囡囡就嚇到喊。
有唔少「怪醫」太太嘅朋友知悉事件後紛紛留言慰問，並呼籲佢哋向商場有關方面索取賠償。不過，「怪醫」太太似乎抱住多一事不如少事嘅態度，話覺得唔需要喇。