政情：手續搞足兩年 吳得掂仲未掂
全體問責官員同行政會議成員，每年七月初都會更新一次利益申報紀錄。其中喺去年七月嗰次更新，外號「吳得掂」嘅教育局局長吳克儉，自爆漏報咗一間早喺一二年初已停止運作嘅顧問公司，聲言正加速辦理手續將該間公司正式結束。點知事隔一年，吳得掂喺最新嘅申報紀錄中，依然話呢間顧問公司嘅結束手續仍未完全搞掂。連咁少嘅嘢都拖足兩年未搞掂，吳得掂真係冇改錯名囉！
樓王小肥張 再添物業
吳得掂遲遲結束唔到佢間顧問公司，但同時就喺今次更新中申報多兩項利益，包括成為咗九龍木球會會員同某鄉村俱樂部嘅附屬會員，反映佢有大把空閒時間，並非因為太忙而搞唔掂間顧問公司。
唔知係咪受到多項樓市辣招影響，與去年嘅申報紀錄比較，一眾問責官員同行政成員嘅持有物業情況變化不大。問責官員「樓王」繼續係勞工及福利局局長張建宗（小肥張），佢擁有嘅物業數目，由去年中嘅八個輕微增至九個，新增物業係位於東區一個未落成嘅住宅單位，由妻子擁有。行會非官守成員方面，亦再度由做過教育統籌局局長嘅李國章蟬聯「樓王」，擁有多達四十個物業同車位，物業遍布英國、香港島同新界多個地區。
至於特首梁振英同政務司司長林鄭月娥嘅利益申報，亦同去年相差無幾，惟獨係林鄭喺英國劍橋嘅兩個單位，一個由自己出租轉咗做由配偶持有及出租，另一個就由自住轉咗做空置，唔知係咪打算用埋嚟收租賺英磅呢？
茂波知驚 申報儲物格
至於曾被指「囤地」同經營劏房嘅發展局局長陳茂波，今年嘅申報紀錄亦與去年變化不大，唯一係佢太太許步明喺澳洲雪梨，新增咗一個儲物格用作出租。佢連太太遠在彼邦嘅儲物格都申報埋，睇嚟真係見過鬼都怕黑，驚死再畀人話佢有利益衝突或漏報利益。