政情：中環出更：德國捧盃 議員分享喜悅
世界盃決賽尋日凌晨開波，一眾立法會議員不論有冇捱夜睇直播，賽後都照舊馬後炮扮專家，大噴口水議波論波。其中新民黨副主席田北辰（田二少），更喺開賽前「升呢」做外公首度抱孫，然後再趕返屋企睇波。之前聲稱力撐南美波嘅長毛梁國雄，就「轉軚」現身一個德國球迷睇波活動，睇完波後仲話領悟到做人道理喎。熱捧德國嘅民主黨單仲偕，尋日仲專登搵番件陳年德國波衫着住開立法會攞威。不過有人歡喜有人愁，民建聯陳恒鑌就大爆支持阿根廷嘅老婆，睇到愛隊落敗之後激動到喊喎。
尋日首嘗抱孫滋味嘅田二少，坦言賽前心情好忐忑，驚個孫仔出世撞正開波時間，雖然探孫係最優先，但最後孫仔「啱啱好」喺十三日晚上約十時出世，就梗係最皆大歡喜啦！佢話長女尋日中午已經入院，唔知係咪想考驗自己同體驗生BB嘅感覺，平日見到曱甴都大叫嘅囡囡，生仔竟然連止痛藥都唔用，最後當然係母子平安，全家上下歡呼之餘，田二少仲有時間安心返屋企沖番個靚涼，然後再舒舒服服觀戰。不過佢就嫌兩隊打法保守沉悶，唔及佢手機內嘅愛女與孫仔嘅相片精彩。
長毛：「冇嘢冇可能」
至於入冊前話歐洲波喺南美冇運行嘅長毛，決賽時就現身觀塘一個德國球迷睇波活動。佢聲稱自己對世盃已冇晒感情，只係人哋叫佢去，又話完場後領略到「自己把握唔到，就人哋把握」嘅道理，慨嘆阿根廷三次錯失入波良機，相反德國捉緊一次機會就成為冠軍。長毛又話，今屆世盃令佢明白冇嘢係冇可能嘅，連巴西都可以輸七比一，所以普選仲係有希望喎！
德國贏波，球迷單仲偕梗係開心啦，特登搵番件○六年買落嘅德國波衫返立法會，非常風騷。但老婆鍾情阿根廷嘅陳恒鑌就透露，太太睇到愛隊落敗後真係喊咗出嚟，為咗令太太唔好諗咁多，佢惟有急急熄電視。其他多名議員如馬逢國、陳婉嫻及麥美娟，亦湊熱鬧加入議論。其中馬逢國竟然記錯咗開波時間，好在有囝囝叫醒佢。同屬工聯會嘅陳婉嫻同麥美娟，聲稱有諗過起身睇直播，但最後雙雙瞓過龍，惟有煲番精華片段補數。
卓妮