有泛民主派團體話要喺今年七月一日提早預演佔領中環，打正旗號反佔中嘅「幫港出聲」，尋日就公布會花約十萬元設立一個名為「陽光射佔中」嘅網站平台，七一當日畀市民上載佔中嘅相片同影片，聲言等啲參與佔中人士「流芳百世」喎。不過，佔中行動向來都冇遮遮掩掩，今次幫港出聲會否倒米，曲線幫佔中宣傳呢？
陽光射佔中搞手話，六月底會成立平台，如果七一有人話要搞佔中行動，佢哋會鼓勵市民喺佔中期間用手機或攝錄機影低參與者違法行為，例如坐喺馬路，到時會有編輯檢視相片或留言係咪涉及私隱條例或誹謗成分，又話已經諮詢法律意見，公眾地方影相唔算犯法，留言係事實就冇問題喎。
搞手仲話，參與得佔中就應該好自豪，唔會介意被人影相，但之後又話唔係好多港人鍾意上鏡。不過，咁樣影人相放上網算唔算網絡欺凌或白色恐怖？搞手聲稱呢啲係「網絡張揚」，尤其阻嚇貪玩嘅未成年人士，「救得一個得一個」，所以參與佔中前諗清楚，佢哋亦「盡量唔會太欺凌」，但就阻止唔到其他人向相中人起底嘞。