政情：學民仔打殘泛民老鬼

早喺政改諮詢展開前，學民思潮已經提出公民提名方案，建議由全港選民組成提名委員會提名特首候選人，之後真普聯之所以會提出包含公民提名、政黨提名同提名委員會嘅三軌方案，講就話係回應民意，但某程度上都係受到學民思潮影響。期後坊間陸續提出嘅政改方案，幾乎大部分都有公民提名元素。為咗令市民容易區分唔同方案，以收集中票源之效，學民決定聯同學聯整合兩者方案，得出最激嘅學界方案。

民陣婦團齊撐學界

民陣二十六個團體前日就三軌方案同學界方案進行投票，最後通過推薦學界方案。而三個婦女團體尋日亦發表聲明，宣布撤回「婦女政改方案」，改為全力支持學界方案，據悉保衞香港自由聯盟稍後都會表態支持學界方案。其實三軌方案同學界方案都有公民提名，但學界方案就激烈得多，任何人只要攞到全港選民百分之一提名，或得到立法會百分之八直選議員支持，即可入閘成為特首候選人。對於現時激進嘅民情，睇嚟只係得政黨支持嘅三軌方案整定淪為籮底橙，莫非真普聯召集人鄭宇碩堂堂一個學者都輸畀班學生？

公民推薦門檻更高

真普聯嘅三軌方案落得如此下場，由包括白鴿黨羅致光等十八名學者提出的公民推薦方案，相信亦難逃摺埋嘅命運，事關鄭宇碩曾批評公民推薦方案嘅門檻係較公民提名方案為高，泛民參選人未必能夠入閘，仲保守過三軌方案，試問又怎會獲整個泛民支持吖！

至於連公民提名同政黨提名都冇提嘅民主阿婆方案，就更加唔入流嘞。估唔到一班泛民老鬼玩民主咁多年，結果被一班學生玩殘，認真羞家。