今日香港百物騰貴，衣食住行樣樣艱難，話就話經濟唔錯，失業率低至幾近全民就業添，可惜基層市民嘅感覺完全係另一回事，尤其係家庭主婦，面對生活壓力，簡直係巧婦難為無米之炊。正所謂，做香港人難，做香港主婦更加難。
唔係功夫茶悲天憫人，而係有事實根據。呢，今日係三八婦女節，有團體之前做咗項調查，結果發現好多婦女不快樂。調查訪問咗五百幾位婦女，年齡介乎二十八至四十二歲，可謂風華正茂嘅社會中堅，佢哋快樂嗎？答案係四成人不快樂，其中一成人更加話非常不快樂添！
可以咁講，調查結果完全係意料中事。以前就話婦女可頂半邊天啫，今日又點止半邊天咁簡單吖。嗱，好多婦女又要返工搵食，又要做家庭主婦，一身兼兩職，仲辛苦過好多男人。為咗家庭生活，為咗下一代幸福，處處都可以見到婦女嘅身影，佢哋一方面要面對工作壓力，一方面又要承受家庭及經濟壓力，又點可能快樂吖？
想當年，貪曾吹水唔抹嘴，要求每對夫婦最好生三個喎。老實講，如果條件許可嘅話，邊個唔想三年抱兩吖，可惜正如李麗珊話齋，培養一名兒童需要四百萬元，試問有幾多人生得起呢？仲有吖，有人計過數，經過咁多年嘅累積通脹，依家培養一名兒童要八百萬添，問你怕未！
所以話，政府鼓勵生育一味大隻講，連託兒服務都嚴重不足，甚至零支援，唔少婦女為咗搵錢養家，就無辦法照顧子女，正一兩頭唔到岸。就以資助託兒服務嚟講吖，本港約有十萬名兩歲以下兒童，但資助名額得一千個咁大把，比例係一比九十九，正如有社福團體話齋，「仲難過入大學」，唔爭崩頭至奇喇。
呢嗱，前排有關注團體訪問咗多間幼兒中心及幼稚園家長，結果顯示託兒服務不足，直接影響生育意願。超過八成受訪者話，如果有合適嘅日間託兒中心，生仔意欲會高啲；更有九成半家長話，如果增加免費全日幼兒服務及彈性上班職位，會考慮改變主意生番個小寶寶。事實證明，香港婦女唔係唔想生育，而係客觀條件唔允許，難為港產官僚仲喺度大講風涼話，簡直九唔搭八。
講開又講，三八婦女節已有百幾年歷史，本來係為咗慶祝婦女對政治、經濟、社會所作出嘅貢獻，可惜到咗廿一世紀嘅今日，好多婦女嘅權益仍然得唔到保障，尤其係處於種種壓力下嘅香港婦女，根本冇可能快樂。唉，婦女節吐苦水，講起都可悲！