探射燈：雙貪遺禍深 港再掀移民潮
受前朝「貪曾」政府遺禍下，本港政治及經濟氣候「一年衰過一年」，中產人士被生活壓迫得喘不過氣，紛紛移民外地尋出路。有移民港人批評「貪曾」勾結地產商，推高樓價；教育制度又朝令夕改，莘莘學子慘成白老鼠；中港矛盾加劇，終日吵鬧不安。保安局估計每年約有八千多人棄港而去，有移民顧問坦言，繼回歸前的移民高峰，由前年起諮詢移民的人數持續上升，新一輪移民潮一觸即發！
「依家政治爭拗愈嚟愈多，政府好多決策唔聽市民意見，問責官員嘅表現令市民好失望！」三十多歲的周氏夫婦家庭月入達十萬元，在港事業有成，但由於「頂唔順」一眾無能高官，一年前決定移民加拿大。
港官「豪花」內地化
從事資訊科技行業的周先生坦言，近年香港官員有「內地化」迹象，尤其是被踢爆豪花公帑送禮飲酒的前廉政專員「貪湯」湯顯明最令他失望，「作為廉政公署一分子做埋啲咁嘅行為，事後仲大條道理講到自己冇問題咁！我以前相信香港係廉潔社會，依家連呢樣嘢都冇埋。」他又批評前特首曾蔭權「貪盡海陸空」，「佢將咁多公帑使落自己身上，令我發覺香港官員同內地官員愈嚟愈似，我唔想囝囝將來受呢種思想影響。」
「我同老公都喺香港出世，喺香港長大，非必要都唔想離開。但依家社會上每日都吵吵鬧鬧，真係好煩！」劉太與任職工程師的丈夫早於五年前，已計劃移民加拿大多倫多。「嗰邊空氣好，對食物監管又嚴格，唔怕買到黑心食物，而且買餸平過香港。」兩夫婦早前以二百八十多萬港元在加國購置一間獨立屋，「距離市中心只係半個鐘車程，我哋喺香港賣完樓再過去買樓，都仲有一半錢剩！」
夫婦二人在港生活四十個年頭，眼見近年物價飛漲、貧富懸殊加劇，劉先生不禁慨嘆「香港變咗」，「以前香港好有人情味，依家就好冷漠，乜都向錢看。太多老闆唔畀人放工，搞到個個冇晒家庭生活，我自己都因為咁，成日陪唔到仔女。」
物價高企 薪金偏低
劉指本港物價高企，薪金水平卻偏低，製造大量在職貧窮，市民活於水深火熱，「以前曾蔭權淨係識畀地產商牽住鼻子走，搞到房屋太貴，後生仔想上樓永遠要靠父母！」
中產大數社會問題多多，對前景失望，引發新一輪移民潮。保安局估計由○五年至去年，每年平均約有八千多名港人移民外國，美國、澳洲及加拿大都是熱門移居地。
潤泰投資移民顧問有限公司總經理黃浩軒指，回歸前後不少港人因擔憂香港的政治前景而引發移民潮，當時的移民人數就上升約百分之五，「但比起回歸期間，呢幾年香港人移民數字係再多咗百分之十左右。」黃表示因為外國的移民政策變動及港人資產增加，香港自○七年就開始新一輪移民潮，更預計今年的移民數字會上升約百分之五。
諮詢人數 飆升三成
「明顯多咗香港人想移民，自前年開始諮詢移民嘅人數開始緩緩上升，上年向我哋公司諮詢移民嘅（港人）人數就升咗三成。」環凱移民顧問有限公司負責人張家禧表示，自九七年的移民潮後，港人的移民申請一直只佔公司總申請約兩成，而近兩年則大幅增加至四成。
中產之聲主席李子榮指，社福政策都以基層為先，中產人士認為付出得不到合理回報，令他們想移居到較有生活保障的地方，「佢哋（中產人士）又會覺得香港教育嘅發展空間唔多，仔女大個之後負擔又大。」李續指，香港人口老化問題嚴重，中產父母擔心政府會增加薪俸稅，令子女生活百上加斤，前景堪虞，相信愈來愈多中產寧願離鄉別井，追尋更美好的將來。
圖：甘偉倫、梁偉恩／文：林偉軒、馬鳳玲