政情：大嶼山發展起波瀾
新一份施政報告提出要研究進一步開發大嶼山東部水域及鄰近地區，打造優質嘅「東大嶼都會」，並於今年一月中成立大嶼山發展諮詢委員會，由發展局局長陳茂波（Paul）擔大旗。原本呢個諮詢委員會成立係個好開始，但點知阿Paul喺委任成員咁簡單嘅工作都幫政府倒米，原來一直撐政府嘅工聯會（工記）中人冇獲邀加入委員會，結果搞工記到同Paul掰晒面，聲言以後冇偈傾喎。
陳補鑊邀入小組勁侮辱
睇番大嶼山發展諮詢委員會嘅委任名單，除咗官方委員外，仲委任咗十九位非官方委員加入，當中民建聯（民記）有三人，包括立法會議員陳恒鑌、離島區議員周轉香、黨副主席陳勇，就連白鴿黨胡志偉都有份。原本建制派佔優實屬正常，但民記有三人被委任就有問題喇，點解？咪係工記極之不滿佢哋冇份加入囉！有工記中人大呻，點解周轉香入到委員會，但工記區議員就冇得入呢？
據聞有工記中人曾經質問阿Paul發生咩事，點知阿Paul就好順口咁回應話，民記始終係港府嘅盟友喎，工記中人唔慶就假啦！不過，更加侮辱嘅事跟住就發生，話說阿Paul翌日立即向工記中人解釋，自稱已經同特首商量過，由於委員會名單已經公開，所以唔方便再加任何人入去，問工記介唔介意做諮詢委員會轄下嘅小組委員會成員喎。
未掌握政治形勢要惡補
話晒工記喺新界西有麥美娟同鄧家彪兩個雙料議員，勞工界鄧家彪更係東涌逸東邨北區議員，而且又有工會代表，淨係做小組委員會成員，你估施捨咩？所以聽聞工記最後決定唔會加入該委員會轄下任何一個小組，仲聲言同阿Paul冇偈傾。
話時話，今次之所以出現委任風波，估計係政府「食硬」工記，諗住任何政策一定會獲工記支持，但亦有可能同阿Paul未掌握政治形勢有關。阿Paul之前因為不小心駕駛，尋日被裁判官批評佢交通安全意識唔高，被罰喺三個月內自費完成駕駛改進課程，如果今次委任風波真係阿Paul漏招搞出個大頭佛，唔知政府會否一併要求佢順便讀埋個政治改進課程呢？