中環出更：譚志源政改論壇扮泛民
政改諮詢期已有三個月，政府「政改三人組」頻頻落區出席論壇，三人組之一嘅政制及內地事務局局長譚志源（Raymond）尋日就聯同署理商務及經濟發展局局長梁敬國「行孖咇」，出席中小企政改論壇。三人組已經見過成九十個團體，真係乜嘢法寶都出齊晒，Raymond於是運用愈來愈多比喻，等大家冇咁悶，尋日仲扮演泛民主派人士添！
話說有人問Raymond咩係篩選，佢就話篩選係個弔詭議題，跟住就一步步推論。Raymond首先話全世界選舉都係一大班人搵個人做代表，否則全體市民都決定就好難管治。跟住佢估計全港有二百四十萬人合資格參選特首，但最終都係得一個人做到，咁泛民話要冇篩選，原則上就係違反咗囉。
「官員推政改 都係民主派」
咁如果唔係原則上反對，而係效果上各個唔同政見人士都可以參選呢？Raymond就話，一個政黨內部都可以有唔同意見，點樣定義呢？佢又話，如果係要泛民、建制同獨立等黨派都可參選，咁咩係泛民呢？「我哋官員推動政改，都係民主派喎！」講咁耐，佢都係想話，「篩選」係偽命題，無謂糾纏咁耐啫。
卓妮