中環出更：商界名人盼復活節親子遊
香港青年工商界早前喺西港城舉行新春聯歡晚宴，好多企業二代及政商界名人出席。復活節將至，唔少人計劃外遊，中華總商會會董張俊勇（Thomas）打算同太太及兩個囡囡去新加坡玩，中華廠商聯合會青委前主席顏明潤（Jaclyn）就想陪兩個囝囝到郊外野餐，大家不約而同選擇做個好爸爸好媽媽。
張俊勇想陪妻女去Lego樂園
Thomas話，太太已經諗定復活假要同兩個女去新加坡，仲會去全亞洲首個樂高主題樂園馬來西亞Legoland玩，事關佢兩個囡囡好鍾意砌Lego，到時佢如果抽到時間就會一齊去喎。
Jaclyn卸任青委主席之後，終於冇咁忙，佢話放假想陪兩個「化骨龍」去郊外野餐，因為佢哋好鍾意大自然同動物，成日扭計要買動物光碟返屋企睇，佢哋連魔鬼魚種類都識分辨，真係唔可以睇小。佢又話，兩個囝囝又成日拎張餐巾鋪喺屋企地下，仲食生果扮野餐，所以若有時間真係要同佢地一齊去郊外，呼吸下新鮮空氣喇！
康泰旅行社董事總經理黃進達就話，受到近期韓劇熱潮影響，加上有櫻花，韓國係港人復活節外遊首選地方，內地短線團亦受歡迎，雖然昆明發生恐怖襲擊事件，但相信影響唔係太大。
當晚到場嘅仲有香港工業總會青年委員會主席馮陳嘉賢、香港中華出入口商會副會長許華傑、商務及經濟發展局副局長梁敬國（Godfrey）。Godfrey話，上任四個幾月都幾適應，冇乜壓力，仲覺得好開心添！不過，佢十一歲嘅囡囡就唔係咁開心喇，經常投訴見唔到爸爸。雖然係咁，但囡囡就好細心提醒佢應酬唔好飲咁多酒，Godfrey直言覺得好窩心喎！
卓妮