中環出更：台辦千人宴膳待長者
圓玄學院、博愛醫院及仁愛堂三個慈善機構日前假機場博覽舘合辦《傑義風采善迎春》春茗，多達一千八百位來自港九新界嘅長者齊去趁熱鬧，會上並嘉許三個機構嘅熱心義工。圓玄學院主席陳國超話，呢個活動規模愈辦愈大，席間仲有好多百歲人瑞，預計參加人數突破二千人指日可待，到時可以考慮將千人長者宴申請健力士紀錄喎！
陳國超話，香港人口老化，安老服務需求日益增加。過去一年三個機構共四千名義工提供逾五十萬小時義工服務，值得嘉許。以義工運動義工總領袖身份出席嘅特首夫人梁唐青儀聽完好開心，佢話如果長者宴有機會申請世界紀錄就太好喇，佢盛讚三個機構積極行善，令長者嘅退休生活豐盛、安心，認真唔話得。
「美容天后」義助新移民
當日好多名人善長都去捧場，包括圓玄學院副主席鄧錦雄、湯修齊及陳國超細仔陳承志、仁愛堂主席陳鄭玉而、博愛醫院主席曾耀祥、副主席何榮添、譚姜美珠及總理曾裕（Joyce），而安老事務委員會長者學苑發展基金委員會主席梁智鴻亦有到場。
「美容天后 」Joyce話，最近佢利用旗下美容訓練學校幫有心學習一技之長嘅新移民提供免費培訓，如果新移民想學腳底按摩、婚紗統籌或室內設計等，佢都可以安排免費課程，就算佢哋想學嘅技能超出美容業範疇，佢亦可請外面嘅義工老師開班授徒。
卓妮