官僚大食懶，市民冇運行，真係冇講錯。就講禽流感吖，港府把關不嚴，辦事不力，結果郁吓就殺雞，郁吓就禁售，搞到本地雞農及雞販損失慘重，血本無歸，你話係咪害人不淺吖。
尋日情人節，家禽業界約咗食衞局局長高永文傾偈，不過唔係談情說愛，而係談賠償問題，可惜雙方雞同鴨講，傾唔埋欄，搞到不歡而散。呢，有業界人士忍無可忍，提出司法覆核，挑戰港府嘅殺雞及禁售決定，呢鑊嘢睇嚟有排搞。話時話吖，當局出手未免太低喇，批發商每隻雞補償三十元，另獲發放三萬元特惠津貼及寬免批發市場檔位租金一個月；雞場東主每隻已滿八十天雞隻賠三十元；零售雞檔可獲公共街市免租一個月及二萬元特惠津貼，等等。當局話喎，賠償金額係根據相關法例釐定，而發放特惠津貼就係考慮到殺雞及禁售行動發生喺農曆新年前夕，對業界造成特別沉重嘅打擊喎。
當局講到有情有義，皇恩浩蕩咁，不過對於業界嚟講完全係另一回事。正如有立法會議員話齋，業界不滿賠償方案，將會爭取更高賠償。雞農更加怒髮衝冠，批評每隻雞三十元嘅賠償額係十幾年前嘅過時標準，今日已經不合時宜。一句講晒，業界不滿賠償額雞碎咁多，隨時有進一步抗議行動。
你話係咪濕滯吖，淨係賠償額都有排拗。其實又難怪業界扯火嘅，家陣百物騰貴，經營困難，過時過節冰鮮雞都賣過百蚊一隻啦，當局手起刀落屠宰活雞二萬隻，而且禁售活雞二十一日，結果每隻只係賠償三十蚊，即係要雞農血本無歸嘅啫。唔好唔記得，今次害到雞農雞毛鴨血，罪魁禍首係邊個吖？咪就係港府囉，如果當局一早肯採納業界意見，將內地雞及本地雞分流處理，根本唔會發生今次災難，港產官僚一次又一次靠害業界，簡直罪無可恕！
講嚟講去，都係前朝政府種下嘅禍根。業界早就要求政府採取分流措施，其中一個方案係分開不同家禽批發市場擺放兩地活雞，避免內地雞中招，本地雞陪葬，但係時任食衞局局長嘅周一嶽闊佬懶理，連中央屠宰計劃都束之高閣，結果次次禽流感殺到，次次殺雞，累到業界雞毛鴨血，怨聲四起。事實證明，庸官禍港，甚於疫症，周一嶽主管食衞局八年，禍港八年，香港今日民怨沸騰，雞犬不寧，全拜廢官所賜！
一句講晒，雞農血本無歸，庸官害人害物。周一嶽花名「每周一鑊」，估唔到佢執包袱之後仲留低咁大個地雷。無論點都好嘞，現屆政府既然接手呢個地雷，就要諗辦法拆掂佢，唔好再搞到雞犬不寧，嘈喧巴閉呀！