政情:李慧玲指控 各方紛紛反駁

商業電台早前突然宣布解僱時事節目主持人李慧玲後,李慧玲翌日即高調開記者會,不斷咁呻自己同商台首席智囊陳志雲嘅恩恩怨怨,話陳志雲吹毛求疵,又話佢曾經就商台續牌一事向通訊事務管理局(通訊局)敲門,以及話陳志雲向佢透露,當陳被廉政公署拘控單官司獲勝訴後,政府又即時提出上訴,係因為李慧玲成日批評政府。

陳志雲斥荒謬

不過,李慧玲呢啲講法,尋日一一被相關機構反駁,仲叫佢拿出證據來。陳志雲尋日喺電台節目反駁李慧玲嘅指控荒謬,又話呢個純粹係李慧玲想描繪嘅圖畫。下午輪到商台總經理陳靜嫻見記者,話李慧玲冤枉商台為續牌滅聲,向政治勢力叩頭,係完全冇事實理據,對商台同香港都帶嚟極大傷害喎。

通訊局同律政司亦紛紛否定李慧玲嘅講法,通訊局話同商台未就續牌事宜接觸,而律政司就話唔同意任何指稱政府上訴係由於不當意圖嘅言論。

咁李慧玲又點回應呢?佢之後喺屋企樓下話自己都好冤枉喎,但就話自己同高層嘅對話並冇錄音證據,之後就做咗人肉錄音機重複番之前講嘅嘢,冇再提任何新論點喇。

第一手消息請下載on.cc東網iPhone/iPad/Android/Windows Phone Apps