政情：余杰新書 港冇出版社肯印
作家若要喺香港出書唔係難，但曾經以國家領導人做著作主題嘅中國異見作家余杰，最近諗住出本新書就遇到阻力，皆因佢想出嘅新書叫《中國教父習近平》。話說佢搵勻香港都冇一間出版社肯同幫佢編印，最後搵到一間獨立出版社肯印喇，點知喺送入印刷廠前夕，出版人同其家人聲稱受到電話威脅，擔心人身安全，所以最終放棄幫佢出呢本新書喎。
曾著《中國影帝溫家寶》
余杰接受一個網上媒體訪問時話，佢本新書《中國教父習近平》喺香港出版時一再受阻，估唔到依家喺香港出版一本書都咁難，所以認為香港出版自由已嚴重惡化。佢又話，自己幾年前出版嘅《中國影帝溫家寶》，雖然曾受到威脅，但都可以喺香港順利出版，佢依家去咗美國，北京控制唔到佢，就對出版社落手喎。
余杰又話，估計佢本新書仍然可以喺香港出版，但如果事與願違，佢就會請求台灣啲出版社另出一個香港版，再運嚟香港賣。
本書已預備咗兩個版本，兩個版本大部分文章都相同，但香港版就另有四篇文章討論中港議題，台灣版就有四篇講兩岸問題，暫時台灣嘅出版工作就仍未受阻喎。