政情：馬紹祥發展局悍將

Eric上任只係一個月多啲，對發展局嘅運作已經瞭若指掌，原來佢廿幾年前曾經打過政府工，之後轉投私人公司，一做就二十年，參與過香港唔少大型基建項目。Eric話，唔好睇佢外表白白淨淨，年輕時都捱過唔少苦，試過喺地盤日曬雨淋，曬到變人乾，又參與過天水圍新市鎮早期規劃，當年政府要收地發展，一啲無業權嘅村屋租戶拎住石油汽罐威脅話唔肯搬走，佢都冇有怕，最終成功擺平事件。

主力負責土地改劃

除咗天水圍，喺洪水橋新發展區早期諮詢時，Eric亦以顧問身份落村做簡介，當年因為村民群情洶湧，佢要警察護駕先可以安全出入，未知係咪因為佢身經百戰，所以一上任就被委以重任，主力負責土地改劃工作，嚟緊政府有意改劃嘅八十幅土地分布喺全港其中十六個地區，所以佢幾乎要走訪全港九新界區議會做游說工作，面對凶險嘅政治環境，佢承認今次係一場硬仗，希望各區可以互相體諒喎。

今屆政府被形容為「熱廚房」，發展局更加係廚房入面嘅大焗爐，點解Eric仲奮不顧身入去做？佢話覺得同發展局理念相近，亦覺得係時候為市民做番啲嘢。不過，發展局高官曾被揭發利益申報不清，佢就好肯定話自己喺新界冇地，只係有個自住物業，海外亦有個單位，身家清清白白，叫大家放心。尋日係難得一遇嘅中西情人節，被問到使唔使買花送畀太太，佢就笑笑口話：「花都係要買嘅！」睇嚟鐵漢都有柔情嘅一面喎。