中環出更：新春團拜 湯圓談心
尋日係十九年一遇嘅中西雙料情人節，科技大學校長陳繁昌等大學高層，齊齊着起圍裙炮製心形湯圓，但一眾教授入實驗室多過入廚房，搓粉團時雞手鴨腳，唔少豆沙餡爆晒出嚟，心形湯圓變成爆漿湯圓，笑料百出。另一邊廂，啱啱「閃婚」嘅新民黨同公民力量（公記）成員就互餵對方食湯圓，扮晒恩愛，三位公記女區議員更主動餵自稱係「女人湯圓」嘅副主席田北辰（田二少）食湯圓，嚇到田二少用日文大叫「Chotto ma te yo（請等一等）」。
科大高層整到爆晒餡
先講科大新春團拜，陳繁昌同五位大學高層搞搞新意思，六個大男人着上紅色圍裙炮製愛心湯圓，祝願大家有個美滿嘅情人節。由於時間關係，湯圓已預先包好餡料，不過呢班教授都可以搞到啲豆沙餡漏晒出嚟，認真搞笑。
科大近年頻頻被挖角，繼前商學院院長鄭國漢去做嶺南大學校長後，副校長黃玉山四月亦將出任公開大學校長。黃玉山話，最難忘九○年科大創校初期，佢連辦公室都冇，只得一張書枱，依家見證科大成為世界知名學府，覺得好開心。陳繁昌就送贈「三個心」畀黃玉山做臨別錦囊，話做校長最緊要「同心、愛心、熱心」喎！
公記三娘炮製田二少
至於新民黨新春團拜，一眾成員齊齊着上唔同顏色嘅唐裝出場，啱啱成為黨副主席嘅潘國山向主席葉劉淑儀送上一個同心結，象徵未來會同心合力應對挑戰，葉太十分受落，之後該黨同公記成員又互餵對方食湯圓扮恩愛。田二少自稱係「女人湯圓」，但係見到三位女將一齊餵佢食湯圓，佢就無福消受大叫「Chotto ma te yo（請等一等）」，要求佢哋逐個逐個嚟，果然識歎。
卓妮