政情：八網難逃：慢必收利是轉贈拾荒婦

農曆新年有利是逗係件開心事，立法會議員陳志全（慢必）嘅大埔議員辦事處信箱尋日就無喇喇收到三封利是，懷疑係區內街坊放入信箱畀佢。慢必收利是當然開心講多謝啦，但佢就決定將街坊嘅心意轉贈區內嘅拾荒婆婆，之後仲將利是相片上載到社交網站，話希望派利是畀佢嘅「神秘街坊」唔好介意喎！除咗將利是轉贈，慢必嘅辦事處亦搞緊新春禮物回收行動，特別係未開封嘅即食食品，佢哋仲打算將回收到嘅新春禮物轉贈區內嘅公公婆婆，既環保又可以做善事，確係一舉兩得。